Дар вилояти Суғд гурӯҳи муташаккили ҷиноӣ боздошт гардид

0
1704

16 январ дар натиҷаи гузаронидани амалиёти махсус аз тарафи кормандони Раёсати Агентии назорати маводи нашъаовари назди Президенти ҶТ дар вилояти Суғд дар ҳамкорӣ бо кормандони прокуратураи ҳарбии вилоят дар ҳудуди шаҳри Конибодом ҳангоми кӯшиши фурӯши маводи нашъаовар хизматчии ҳарбии яке аз сохторҳои қудратии ҷумҳурӣ бо рутбаи “майор” боздошт гардид, ки аз ӯ як адад борхалта мусодира гардид. Дар дохили он 10 адад бастаи рангаш сабз бо бӯи махсус мавҷуд буд.

Гурӯҳи оперативӣ се нафар аъзоёни боқимондаи гурӯҳро аз шаҳри Душанбе боздошт намуд ва ба Хуҷанд барои гузаронидани амалҳои тафтишотӣ интиқол намуд.

Пас ҳангоми кофтуков дар ҳавлии боз як аъзои гурӯҳ дар ноҳияи Бобоҷон Ғафуров саги хизматӣ бо лақаби “Дина” ба махфигоҳ дар боми каҳхона ишора намуд, ки дар он ҷо 5 дона зарфи нӯшокӣ бо маводи рангашон сафеду зардчатоб мавҷуд буд.

Ҳамагӣ аз гурӯҳи ҷинояткор 23 кг маводи нашъаовар мусодира гардид, ки аз онҳо 5 килограммашро героин ташкил менамояд.

Тавре тафтишоти пешакӣ нишон дод, аъзоёни гурӯҳи муташаккил ният доштанд интиқоли маводи нашъаоварро берун аз ҳудуди ҷумҳурӣ ба роҳ монанд, аммо кормандони Раёсати Агентӣ пеши роҳи ин ҷиноятро гирифтанд.

Аз рӯи ҳодисаи мазкур аз тарафи Гурӯҳи тафтишоти Раёсати Агентӣ парвандаи ҷиноӣ бо моддаи 200 қ.4 КҶ ҶТ (“Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан дар ҳаҷми махсусан калон”) оғоз гардидааст.

Боздоштшудагон ба Тавқифгоҳи нигоҳдории муваққатии Раёсати Агентӣ ворид карда шуданд. Аъзои панҷуми гурӯҳ ҳоло дар кофтуков қарор дорад.

НАЗАРИ ХУДРО ГУЗОРЕД