Дар ноҳияи Бохтар ва шаҳри Панҷакент маводи нашъаовар мусодира гардид

0
1462

13 январ кормандони Раёсати Агентии назорати маводи нашъаовари назди Президенти ҶТ дар вилояти Хатлон, ки хабари оперативӣ дарёфт намуданд, дар роҳи автомобилгарди ноҳияи Бохтар автомашинаи тамғаи “Муссо”-ро боздошт намуданд. Ҳангоме, ки кормандони оперативӣ дохили автомашинаро кофтуков менамуданд, ронанда оромона рафтор намуд, аммо вақте, ки ба кофтукови либосҳои шахсӣ гузаштанд, асабонӣ шуд: дар кисаи курткаи дар танаш буда як бастаи селофанпеч бо маводи қаҳваранг дарёфт гардид.

Сипас кормандони оперативӣ ба шаҳри Қӯрғонтеппа равон шуданд ва ҳавлиро, ки ронанда онро иҷора мегирифт, кофтуков намуданд. Аз дохили қуттии картонии яхдон се бастаи селофанӣ бо маводи хамирмонанд ёфт ва мусодира гардид.

Тавре мутахассисони Шуъбаи экспертизаи судии Раёсати Агентӣ муайян намуданд, маводи дарёфтшуда афюн мебошад. Ҳамин тариқ боз як сарчашмаи фурӯши маводи нашъаовар барҳам дода шуд.

Амалиёти дуюмро кормандони Шуъбаи байниноҳиявии Зарафшони Раёсати Агентӣ дар вилояти Суғд гузарониданд. Дар шаҳри Панҷакент ду нафар сокини кӯчаи Терешкова боздошт гардиданд, ки аз онҳо як адад бастаи селофанпеч ёфт ва мусодира гардид.

Мутобиқи маълумотномаи гурӯҳи экспертизаи криминалистии ШВКД шаҳри Панҷакент маводи мусодира шуда афюн буда, вазни он 1 килограммро ташкил менамояд.

Аз рӯи ҳар ду ҳодиса парвандаҳои ҷиноӣ оғоз гардида, тафтишот давом дорад.

НАЗАРИ ХУДРО ГУЗОРЕД