Кормандони Агентӣ нашъаҷаллобони пеш судшударо боздошт намуданд

0
1252

Шабонарӯзи гузашта кормандони Агентии назорати маводи нашъаовари назди Президенти ҶТ дар минтақаҳои мухталифи ҷумҳурӣ се нуқтаи фурӯши маводи нашъаоварро нобуд сохтанд, дар натиҷа нашъаҷаллобон боздошт шуданд.

Кормандони Шуъбаи Байниноҳиявии Гурӯҳи Ноҳияҳои Кулоби Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Хатлон дар ҳудуди шаҳри Кӯлоб сокини маҳаллиро боздошт намуданд, ки аз ӯ бастаи героин дарёфт гардид. Тафтишоти пешакӣ муайян намуд, ки боздоштшуда қаблан ду маротиба бо моддаи 200 қ. 3 КҶ ҶТ (“Муомилоти ғайриқонунии воситаҳои нашъадор ё моддаҳои психотропӣ бо мақсади ба соҳибияти каси дигар додан ба миқдори калон”) суд шуда будааст.

Аз тарафи кормандони Шуъбаи байниноҳиявии Зарафшони Раёсати Агентии назорати маводи нашъаовари назди Президенти ҶТ дар вилояти Суғд дар ҳудуди шаҳри Панҷакент дар гумони даст доштан ба муомилоти ғайриқонунии маводи нашъаовар ду сокини маҳаллӣ дастгир карда шуданд, ки аз онҳо маводи нашъаовари афюн ошкор ва мусодира гардид. Ҳангоми гузаронидани амалҳои тафтишотӣ муайян гардид, ки яке аз бошдоштшудагон якчанд сол қабл дар қаламрави кишвари ҳамсоя барои даст доштан ба муомилоти ғайриқонунии маводи нашъаовар суд шуда буд.

Кормандони Раёсати Сайёри Оперативии Агентӣ дар шаҳри Душанбе сокини ноҳияи Рӯдакиро боздошт намуданд, ки дар дохили автомашинаи “Опел-Астра” афюн ошкор ва мусодира гардид. Кормандони оперативӣ муайян намуданд, ки соҳиби автомобил қаблан бо моддаи 147 КҶ ҶТ (“Вайрон намудани дахлнопазирии манзил”) суд шуда будааст.

Аз рӯи ҳамаи ҳодисаҳо тафтишот рафта истодааст.

НАЗАРИ ХУДРО ГУЗОРЕД