Натиҷаҳои сафари ҳайати Агентӣ ба Россия

0
1186

Моҳи декабри соли 2014 ҳайати Агентии назорати маводи нашъаовари назди Президенти ҶТ таҳти роҳбарии Директори Агентӣ генерал-лейтенанти милитсия Р. Назарзода ба шаҳрҳои Қазон, Москва ва Санкт-Петербурги Федератсияи Россия сафари корӣ анҷом доданд.

Сафари мазкур бо мақсади ташкили ҳамкорӣ оид ба бастани роҳҳои қочоқи маводи нашъаовар аз Ҷумҳурии Тоҷикистон ба Федератсияи Россия, мубодилаи иттилооти оперативӣ, коркарди муштараки гурӯҳҳои ҷиноятпеша, инчунин табодули таҷриба ва гузаронидани корҳои пешгирикунанда анҷом дода шуда буд.

Вохӯрии нахустин 16 декабр дар шаҳри Қазон баргузор гардид, ки дар он Директори Агентии назорати маводи нашъаовари назди Президенти ҶТ генерал-лейтенанти милитсия Р. Назарзода бо сардори Раёсати Хадамоти Федеролии Федератсияи Россия оид ба назорати муомилоти маводи нашъаовар дар Ҷумҳурии Тотористон, генерал-лейтенанти политсия Ф. Шабаев, бо иштироки котиби Шӯрои амнияти Ҷумҳурии Тотористон А. Шафигулин масъалаҳои ҳамкориҳои дуҷонибаро мавриди муҳокима қарор доданд. Инчунин дар вохӯрӣ сардорони ҷузъу томҳои Агентӣ, Раёсати Хадамоти Федеролии Федератсияи Россия оид ба назорати муомилоти маводи нашъаовар дар Ҷумҳурии Тотористон, намояндагони дастгоҳи марказии Хадамоти Федеролии Федератсияи Россия оид ба назорати муомилоти маводи нашъаовар, инчунин кормандони Раёсати Хадамоти Федеролии муҳоҷират дар Ҷумҳурии Тотористон ва намояндагони Ассамблеяи халқҳои Тотористон иштирок намуданд.

Худи ҳамон рӯз ҳайати Агентӣ дар Қасри дӯстии халқҳои шаҳри Қазон бо намояндагони ҷомеаи тоҷикон дар Тотористон ва донишҷӯёне, ки дар мактабҳои олии Қазон таҳсил менамоянд, вохӯрӣ намуданд. Ба иштирокчиёни вохӯрӣ оид ба баъзе тамоюлҳои вазъи вобаста ба маводи нашъаовар дар Ҷумҳурии Тоҷикистон ва минтақа муаррифӣ шуд, инчунин дар бораи чораҳое, ки аз тарафи Ҳукумати Тоҷикистон оид ба эътидол овардани он андешида мешаванд, ташаббусҳои Президенти ҶТ Эмомалӣ Раҳмон дар соҳаи мубориза бар зидди муомилоти ғайриқонунии маводи нашъаовар маълумот дода шуд. Ба саволҳои аз тарафи ҳозирин ба роҳбарияти Агентӣ дода шуда ҷавоби мушаххас дода шуд. Дар байни иштирокчиён буклетҳо, маҷаллаҳо, тақвимҳо дар мавзӯи зиддимухаддиротӣ тақсим карда шуданд.

 

18 декабр дар шаҳри Москва вохӯрии Директори Агентӣ Р. Назарзода бо Директори Хадамоти Федеролии Федератсияи Россия оид ба назорати маводи нашъаовар Виктор Иванов баргузор гардид.

Сипас вохӯрии ҳайати Агентӣ бо роҳбарияти ХФНМН ФР баргузор гардид. Дар рафти вохӯрӣ қайд гардид, ки Тоҷикистон ва Россия дар амалиётҳои муқовимат бар зидди муомилоти ғайриқонунии маводи нашъаовар, ҳам дар шакли дуҷониба, ҳам дар чорчӯбаи Созмони Аҳдномаи Амнияти Дастаҷамъӣ, Созмони Ҳамкории Шанхай, дигар созмонҳои байналмилалӣ ва минтақавӣ самаранок ҳамкорӣ менамоянд. Амалиётҳои муштараки ХФНМН Россия ва Агентӣ дар мубориза бар зидди қочоқи маводи мухаддир аз Афғонистон саҳми арзанда доранд. Инчунин масъалаҳои ташкил ва инкишофи ҳамкориҳои судманд оид ба мубориза бо муомилоти ғайриқонунии маводи нашъаовар, бастани роҳҳои қочоқи маводи нашъаовар аз Ҷумҳурии Исломии Афғонистон тавассути Ҷумҳурии Тоҷикистон ба Федератсияи Россия, мубодилаи иттилооти оперативӣ, коркарди муштараки гурӯҳҳои ҷиноятпеша, ошкор ва дастгир намудани шахсони дар кофтукови байналмилалӣ қарордошта ва тарҳрезии нақшаҳои муштараки кории минбаъда, инчунин табодули таҷриба, ташкили курсҳои такмили ихтисос ва бозомӯзии кормандон, гузаронидани чорабиниҳои профилактикии зиддинашъамандӣ, масъалаи кушодани намояндагии Агентӣ дар Россия мавриди муҳокима қарор дода шуданд.

Диққати ҳозирин ба ташаббусҳои зиддимухаддиротии Президенти Ҷумҳурии Тоҷикистон, тадбирҳои амалии мақомоти ҳифзи ҳуқуқи ҷумҳурӣ дар мубориза бо муомилоти ғайриқонунии маводи нашъаовар ва пешгирии паҳншавии он, татбиқи Созишномаи байни АНМН ҶТ ва ХФНММН ФР оид ба расонидани кӯмак ба Агентӣ аз 5 октябри соли 2012 ҷалб карда шуда, таъкид гардид, ки ин тадбирҳо имрӯз натиҷаҳои дилхоҳ дода истодаанд.

Роҳбарияти Хадамоти Федеролии Россия оид ба назорати муомилоти маводи нашъаовар ташаббусҳои Президенти Ҷумҳурии Тоҷикистонро дар бораи дар моҳи майи соли 2015 дар шаҳри Душанбе баргузор намудани Конференсияи байналмилалии зиддимухаддиротӣ дастгирӣ намуд.

Ҳамзамон пешниҳод шуд, ки дар ҳамин давра ҷаласаи навбатии Шӯрои ҳамоҳангсозии роҳбарони мақомоти салоҳиятдор оид ба мубориза бар зидди муомилоти ғайриқонунии маводи нашъадори давлатҳои аъзои Созмони Аҳдномаи амнияти дастаҷамъӣ гузаронида шаванд.

Масъалаи тамдиди минбаъдаи “Созишномаи байни АНМН ҶТ ва ХФНММН ФР оид ба расонидани кӯмак ба Агентӣ” муҳокима гардид.

Хадамоти Федеролии Федератсияи Россия дар чорчӯбаи“Созишномаи байни АНМН ҶТ ва ХФНММН ФР оид ба расонидани кӯмак ба Агентӣ дар соҳаи муқовимат бар зидди муомилоти ғайриқонунии маводи мухаддир”, ки 5 октябри соли 2012 ба имзо расид, кӯмаки амалӣ расонида истодааст. Ба Агентӣ нақлиёти махсус, техникаи компютерӣ ва офисӣ, либоси низомӣ барои кормандон супорида шуд.

Иштирокчиёни вохӯрӣ ӯҳдадор шуданд, ки оид ба ҳамкорӣ дар чорчӯбаи Созмони Ҳамкории Шанхай бо назардошти иқтидори сиёсии ин созмон ба ҳалли вазифаи аввалиндараҷа – нобуд сохтани марказҳои истеҳсоли маводи мухаддир муваффақ гарданд.

Сипас вохӯрии ҳайати Агентӣ бо роҳбарияти раёсатҳои ХФНМН Россия дар шаҳри Москва ва вилояти Москва баргузор гардид.

Дар Базаи Хадамоти ташхисии Раёсати ХФНМН Россия дар вилояти Москва ба ҳайати Агентӣ усулҳои пинҳон намудани маводи манъгардида, ки кормандони Раёсат онҳоро ошкор намуданд, гузаронидани тарзҳои тадқиқоти химиявӣ ва дактилоскопӣ, хизмати сагҳои ҷустуҷӯӣ намоиш дода шуданд.

Инчунин дар шаҳри Москва бо Сафири Фавқуллода ва Мухтори Ҷумҳурии Тоҷикистон дар Федератсияи Россия И. Сатторов, кормандони Сафорат, аъзоёни Шӯрои ҷамъиятии назди Сафорат, ҷамъиятҳои тоҷикон ва ҳамватанон, донишҷӯён аз Тоҷикистон, ки дар донишгоҳу донишкадаҳои Москва таҳсил менамоянд, намояндагони воситаҳои ахбори омма вохӯриҳо баргузор гардиданд.

Ҳангоми вохӯриҳо доир ба масъалаҳои иштироки фаъолонаи шаҳрвандон дар интихоботи навбатии Маҷлиси Олии Ҷумҳурии Тоҷикистон, ташаббусҳои зиддимухаддиротии Президенти Ҷумҳурии Тоҷикистон, тадбирҳои амалии мақомоти ҳифзи ҳуқуқи ҷумҳурӣ дар мубориза бо муомилоти ғайриқонунии маводи нашъаовар ва пешгирии паҳншавии он, андешидани тадбирҳои иловагии Ҳукумати Тоҷикистон ҷиҳати ба эътидол овардани масъалаи муҳоҷирати корӣ, комёбиҳои иҷтимоӣ ва иқтисодии ба дастовардаи Тоҷикистон дар солҳои охир маълумот дода шуд.

Иштирокчиёни вохӯриҳо қайд карданд, ки солҳои охир шаҳрвандони Тоҷикистон дар ободонӣ, тараққиёт ва рушди иқтисодиёти кишвар саҳми арзанда гузошта, таъриху фарҳанг, идҳои миллӣ ва расму оини халқи тоҷикро дар байни дигар халқҳои ин минтақаҳо муаррифӣ менамоянд.

Ҳамзамон пешниҳод карда шуд, ки бо мақсади боз ҳам мустаҳкам гардонидан ва равнақ додани муносибатҳои дуҷониба ҳар сол дар арафаи ҷашну идҳои миллӣ аз ҳисоби мутахассисони вазорату идораҳои дахлдор, ҳунармандони касбӣ, аҳли адаб ва фарҳанг ба минтақаҳои Федератсияи Россия гурӯҳҳои корӣ ва эҷодӣ фиристода шаванд.

Дар баробари ин қайд гардид, ки мутаассифона, ҳоло ҳам баъзе муҳоҷирони корӣ аз Тоҷикистон бе доштани ихтисоси муайян, ба таври кофӣ надонистани қонунҳои амалкунанда, таърих, фарҳанг, урфу одат ва забони русӣ ба Россия мераванд.

 

19 декабр дар шаҳри Санкт-Петербург бо роҳбарияти Раёсати ХФНМН Россия дар шаҳри Санкт-Петербург ва вилояти Ленинград, Донишкадаи такмили ихтисоси Шимолу Ғарби ХФНМН Россия, инчунин бо намояндаи Ҷумҳурии Тоҷикистон дар шаҳри Санкт-Петербург ва вилояти Ленинград вохӯрӣ баргузор гардид.

moskow2015

Дар рафти сафар ба Донишкадаи такмили ихтисоси Шимолу Ғарби ХФНМН Россия ҳайати Агентӣ аз заминаи моддӣ-техникии Донишгоҳ дидан намуданд, бо хусусияти омода намудани ҷузъу томҳои зиддимухаддиротӣ, шароити омӯзиш ва зисту зиндагонии онҳо шинос шуданд.

Дар рафти вохӯрӣ сардори Донишкадаи такмили ихтисоси Шимолу Ғарби ХФНМН Россия генерал-майори политсия Г. Широков ва ҳайати Агентӣ масъалаҳои дурнамои ҳамкории байналмилалӣ дар чорчӯбаи омода намудани кадрҳои мақомоти зиддимухаддиротии Тоҷикистон ва кормандони ХФНМН Россияро муҳокима намуданд.

Рафти сафар дар васоити ахбори оммаи Тоҷикистон ва Россия васеъ инъикос гардид.

Тасмим гирифта шудааст, ки дар соли 2015 кормандони мақомоти ҳифзи ҳуқуқи ҷумҳурӣ барои такмили ихтисос ва бозомӯзӣ дар Базаи хизмати ташхисӣ-криминалистии Хадамоти Федеролии Россия оид ба назорати муомилоти маводи нашъаовар дар шаҳри Москва ва Донишкадаҳои такмили ихтисоси Шимолу Ғарби Хадамоти Федеролӣ дар шаҳрҳои Санкт-Петербург ва Уфа, кормандони Агентӣ ва мутахассисони соҳаи наркологӣ барои мубодилаи таҷрибаи пешқадам дар самти пешгирии нашъамандӣ ва табобати беморони нашъаманд ба Ҷумҳурии Тотористон равон карда шаванд.

Бояд қайд намуд, ки ин сафари нахустин ба Федератсия Россия намебошад: моҳи декабри соли 2013 ҳайати Агентӣ ба вилоятҳои Тюмен, Омск, Свердловск, Новосибирск, кишвари Красноярски Россия сафар намуда, бо роҳбарияти раёсатҳои ХФНМН дар ин вилоятҳо, роҳбарияти Донишкадаи ҳуқуқии Сибир, бо донишҷӯни тоҷикистонӣ, ки дар ин мактаби олӣ таҳсил менамоянд, вохӯрӣ баргузор намуда буд. Айни ҳол дар ин мактаби олӣ 27 нафар курсантон – фарзандони кормандони Агентӣ таҳсил менамоянд, ки баъди хатми Донишкада хизматро дар Агентӣ давом хоҳанд дод.

Дар маҷмӯъ баргузории сафари корӣ, вохӯрӣ ва мулоқотҳо аз тарафи роҳбарияти мақомоти ҳифзи ҳуқуқ, мақомоти ҳокимияти иҷроия ва намояндагони ҷамъиятҳои тоҷикон манфиатовар ва саривақтӣ арзёбӣ гардиданд. Таҷрибаи андӯхта минбаъд дар фаъолияти хизматии Агентӣ самаранок истифода бурда хоҳад шуд.

piter2015 piterszipk2015

НАЗАРИ ХУДРО ГУЗОРЕД