НАТИҶАҲОИ ФАЪОЛИЯТИ РАЁСАТИ АГЕНТИИ МАВОДИ НАШЪАОВАР ДАР СОЛИ 2014

0
1593

Дар Раёсати Агентии назорати маводи нашъаовари назди Президенти Ҷумҳурии Тоҷикистон дар вилояти Суғд бо ширкати васеи рўзноманигорон нишасти матбуотӣ оид ба ҷамъбасти фаъолияти Раёсати Агентӣ дар соли 2014 баргузор гардид.

Нахуст сардори Раёсат доир ба натиҷаҳои фаъолияти Раёсати Агентӣ дар соли 2014 маълумоти муфассал дод. Тавре тазаккур рафт, дар соли 2014 аз ҷониби Раёсати Агентӣ дар натиҷаи чорабиниҳои оперативӣ-ҷустуҷӯӣ 44 ҷинояти вобаста ба гардиши ғайриќонунии маводи нашъаовар ошкор карда шуд, ки нисбати соли 2013 – 37,5 фоиз зиёд мебошад.

Барои содир намудани ҷиноятҳои мазкур 60 нафар шаҳрвандон, ки 8 нафари онҳоро пештар судшудагон ташкил медиҳанд, ба ҷавобгарии ҷиноятӣ кашида шудаанд.

Дар давраи ҷамъбастӣ аз гардиши ғайриқонунӣ 159 кг 471 грамм навъҳои мухталифи маводи нашъаовар мусодира шудааст, ки ин нишондод нисбати соли 2013 1 фоиз зиёд буда, аз он 11 кг 615 граммро маводи нашъаовари навъи «героин», 23 кг 400 граммро маводи нашъаовари навъи «афюн» ва 124 кг 456 граммро маводи нашъаовари гурӯҳи «бангдона» ташкил медиҳанд.

Сардори Раёсат ҳамчунин қайд карда гузашт, ки дар соли 2014 аз ҷониби мақомоти ҳифзи ҳуқуқ ва сохторҳои низомии вилоят 222 ҷинояти марбут ба муомилоти ғайриқонунии маводи мухаддир ошкор ва аз гардиши ғайриқонунӣ дар маҷмӯъ 609 кг 699 грамм навъҳои мухталифи маводи нашъаовар мусодира шудааст, ки он аз 103 кг 505 грамм маводи нашъаовари навъи «героин», 148 кг 453 грамм маводи нашъаовари навъи «афюн» ва 357 кг 734 грамм гурӯҳи бангдонагиҳо иборат мебошад.

 

Дар рафти нишасти матбуотӣ оид ба масоили пешгирии нашъамандӣ дахл карда шуда, зикр гардид, ки барои баланд бардоштани рӯҳияи зиддинашъамандии табақаҳои гуногуни аҳолӣ аз ҷониби кормандони Раёсат 120 баромад дар васоити ахбори омма амалӣ карда шуда, 83 вохӯриҳои таблиғотии пешгирикунанда ва 24 чорабинии фарогири фарҳангӣ-фароғатӣ баргузор карда шуданд.

Ҳамчунин зикр шуд, ки дар вилоят дар соли 2014 нисбати ба соли 2013 теъдоди нашъамандон 1,3 фоиз ё худ аз 1075 нафар то 1060 нафар коҳиш ёфтааст. Коҳиши сафи нашъамандон асосан аз ҳисоби мардон, сокинони деҳот, ашхоси синнашон аз 18 то 30-сола ба чашм мерасад.

Аз нигоҳи шаҳру навоҳӣ бошад, кам шудани теъдоди нашъамандон дар шаҳру ноҳияҳои Хуҷанд, Чкалов, Исфара, Конибодом, Панҷакент ва ноҳияи Ҷ. Расулов ба чашм мерасад.

Нишасти матбуотӣ бо мубодилаи саволу ҷавоб байни масъулини Раёсат ва ҷамъи хабарнигорон ба поён расид.

НАЗАРИ ХУДРО ГУЗОРЕД