Агентии назорати маводи нашъаовари назди Президенти Ҷумҳурии Тоҷикистон. Ҷумҳурии Тоҷикистон, Қ/А 50. ш. Душанбе, кӯч. Н. Қарабоев-52.

ТАРҒИБ ВА РЕКЛАМАИ ҒАЙРИҚОНУНИИ МАВОДИ НАШЪАДОР

Қонунгузории Ҷумҳурии Тоҷикистон барои тарғиби маводи нашъадор, моддаҳои психотропӣ ё перекурсорҳои онҳо ҷавобгарии маъмуриро пешбинӣ намудааст. Новобаста аз ин дар ҷомеа афроде ёфт мешаванд, ки бо ҳар роҳу восита барои тарғибу ташвиқи маводи нашъадор ва ҷалби нашъамандон ба ин маводи марговар даст доранд.

Ташвиқу тарғиби воситаҳои наъшадор диққати аксари ҷавонону наврасонро ҷалб намуда, оқибатҳои хатарнокро дар ҷомеа ба вуҷуд меорад.

Бинобар ин, кормандони Агентии назорати маводи нашъовари назди Президенти Ҷумҳурии Тоҷикистон ҷиҳати пешгирӣ ва бартараф намудани омилҳои тарғиботии маводи нашъадор тадбирҳои мушаххасу мақсаднокро амалӣ намуда истодаанд. Чунончи ҳафтаи сипаришуда дар бозорҳои шаҳру ноҳияҳои кишвар як қатор санҷишҳои муштаракро баргузор намуда,  тарѓиб ва рекламаи ѓайриќонунии маводи нашъадорро дар либосҳои мардона ошкор намуданд.

Натиҷаи санҷишҳои гузаронидашуда дар бозорҳои “Корвон” ва “Ганҷина”-и шаҳри Душанбе 17 ҳолати фуруши либосҳои дорои аксҳои барги ниҳоли бангдонаро ошкор намуд. Дар натиҷа аз 17 нафар соҳибкорони инфиродие, ки ба фуруши чунин либосҳо машғул буданд, 239 адад либоси сабуки варзишӣ ва 530 адад куллоҳи варзишӣ бо тартиб додани ҳуҷатҳои дахлдор мусодира карда шуд.

Бояд зикр намуд, ки чунин як санҷиш дар бозори ноҳия Ёвон низ гузаронида шуда, аз 4 нафар соҳибкорони инфиродӣ  21 адад либосҳои варзишӣ бо акси ниҳоли бангдона, ки воситаҳои тарғиботию ташвиқотиро ташкил медоданд, ошкор ва мусодира карда шуд.

Ба ҳамин монанд, шаҳрвандон Ризоев Зафар Маҳмадрузиевич ва Шарифзода Муҳаммадҷон Алихон то инҷониб ба хондани суруд дар жанри реп машғул буда, дар шабакаҳои иҷтимоӣ, аз ҷумла дар Ютуб, Фейсбук, Раудер – Офитсиал ва Тик – Ток саҳифаи  алоҳида кушода, дар онҷо сурудҳои тарғиботии дорои характери ҷалбнамоӣ ба нашъмандию нашъаҷалобиро ҷой карда, бо паҳн намудани ин сурудҳо диққати ҷавононро бо худ ҷалб намудаанд.

Номбурдагон аз ҳисоби ашъори тарғиботии нашъамандӣ, чунончи клип бо сурудҳои “Каннабис ва Марихуана”, ки муаллифи ин сурудҳо худашон мебошанд, маблағи муайян ба даст оварда, ба ин восита ба мафкураю андешаи шунаванда ва бинанда таъсири манфӣ мерасонидаанд.

Ҳамин тариқ нисбати соҳибкорони инфиродӣ, ки ба фурӯши либосҳои дорои аксҳои тарғиботии маводи нашъадор машғул буданд ва сарояндагони репсаро аз тарафи Агентии назорати маводи нашъаовари назди Президенти Ҷумҳурии Тоҷикистон парвандаи маъмурӣ бо моддаи 131 Кодекси ҳуқуқвайронкунии маъмурии Ҷумҳурии Тоҷикистон, ки  тарѓиби маводи нашъадор, моддањои психотропї ё прекурсорњои онњоро пешбинӣ намудааст, оғоз гардида, нисбати онҳо аз тарафи мақомоти судии шаҳру ноҳияҳои дахлдор ба андозаи аз 10 то 20 нишондиҳанда барои ҳисобҳо ҷарима татбиқ  карда шуд.

Бинобар ин, аз ҳамаи соҳибкорон ва ҳунармандон, инчунин ҷомеаи шаҳрвандӣ даъват ба амал меорем, ки барои ба даст овардани фоидаи муфт ба тарѓиби маводи нашъадор, моддањои психотропї ва прекурсорњои онњо, инчунин дигар маводи ғайриқонунӣ машғул нашаванд.

Дар тарбияи насли ояндасози ҷомеа, пешгирӣ аз ҷинояткорӣ ва рафтору одатҳои номатлуб, ба роҳ мондани низоми корҳои тарбиявӣ бо аҳли ҷомеа ва таъмини тарзи ҳаёти солим дар байни ҷавонону наврасон саҳми арзандаи худро гузоранд.